القافلة تعوى ... و الكلاب تسير

على فكرة العنوان مش غلط و لا هرتلة و لا بمبدأ خالف تعرف أو تعالى فى الهايفة و اتصدر ... لأ لأ و الف لأ .
صحيح العنوان مش تأليفى و عرفتها من واحد صاحبى بس هى معبرة فعلا عن كل حاجة بتحصل حوالينا .... طبعا تفهم من كده انى هقلبها غم ..- يعنى لو ميشغلكش متكملش - بس مش انا اللى بقلبها غم ... الحقيقة هى اللى بتعمل كده فينا, دايما بنهرب من حالنا و يأسنا بضحكة تختلف الوانها من واحد للتانى و من موضوع بنداريه لموضوع تانى, لدرجة ان الكل مسمينا شعب ابن نكته, حاجة ممكن تبسطك شوية و تخليك تفكر انك تضحك اكتر بس مش عارف ليه محدش بيفكر ان ده وراه قهر و هموم كتير بنحاول نزيحها بشوية ضحك.


ممكن أبدأ اقول ان العنوان ده اقرب ما يكون للواقع المرير اللى عايشينه ... - ممكن تقوللى و هو انت شوفت ايه من المرارة علشان تتكلم - أقولك بشوفها كل يوم فى عيون الناس و هى ماشية و بحسها لما اشوف شباب بيحشش و بحسها لما بسمع تقاري الحكومة و أشوف افعالها فى ارض الواقع - بس حتى لو مكنش مرير .... ليه منبقاش عايشين محترمين, ليه مبنحسش اننا بناخد حقنا زى ما واجبتنا بتتاخد مننا, ده هو العنوان ان الشعب نفسه يبقى كويس و بيصيح بس للأسف ان اللى المفروض يكونوا امل هما اللى قتلوه.


بصراحة سمعت الجملة دى و افتكرت قصيدة هشام لجخ ( جحا ) و لو مكنتش مصدقنى اسمع كلامها و اسأل نفسك محصلش انك تعرف واحد بيحصله جزء من اللى فيها - اكيد مش كلها بتحصل لواحد بس هو بيتكلم عن حال المصرى و مصر :

شعور سخيف ... انك تحس بان وطنك شيء ضعيف
..صوتك ضعيف ... رأيك ضعيف
انك تبيع قلبك و جسمك ... و انك تبيع قلمك و اسمك
..ميجيبوش حق الرغيف
سألوا جحا عن سر ضحكه .. قالك أصل اتنين و شبكوا
اللى كان من تحت ميت ... و اللى كان من فوق كفيف
ده شعور سخيف
و شعور سخيف انك تكن رمز الشحاته  
... تبنى مبنى للشحاته
.. تعمل وزارة للشحاته
يا ساقية دورى عدى فوقى و دوسى ...
نصبوا على و شحتونى فلوسى...
ربطونى فيكى حتى ما اتغميت
هما اللى فرحوا و وحدى انا اتغميت
انا اللى صاحب البيت .. عايش بدون لازمة
و لما مرة شكيت ... ادونى بالجزمة
مش لاقى تطفح يا ديك ... هاتولنا و جيبولنا و ادونا  دولنا ... هنجيب منين نديك
مش لاقى تطفح يا ديك ... طافح يا بلدى غدايا و لوعتى غدايا
و ادى الاحبة التقوا و اتجمعوا عدايا ...
انا اللى زارعك دهب بتأكلينى سباخ
ما ان كان ده تقل و دلع .... بزيادة دلعك باخ
لا شوفت فيكى هنا ... و لا شفت فيكى ترف
كل اللى فيكى قرف ... كرامتنا متهانة
و اللقمة باهانه ... بتخلفينا ليه لما انتى كارهانا
يعنى ايه تبقى هبة النيل يا بوبة ...
و كل يوم الماية تقطع ...
يعنى ايه لما اشتكى غلو الفاتورة  ...
يقولوا تشكى بس تدفع ...
لما قش الرز ثروة بتتحرق .....و اما نفط الامة ثروة بتتسرق
و اما جلادك على ولادك بيبطش
و اما علمك ميلاقيش ياكل فيطفش
يعنى ايه نرفع ايدينا بالسلام لاجل الغزاة
و يعنى ايه لما ابقى ماشى فى حالى اتشد اشتباه
و يعنى ايه اتحبس اربع سنين حبس احتياطى ... حبس اعتباطى
يعنى ايه مش حاسة بالعمر و غلاوته....
بتصبى مر العمر ليه ... ده انا كنت حوهبلك حلاوته
انا عمرى ما اتأمرت و لا حطيت شروطى
و مكان ما ترسى مركبك ببنى شطوطى
انا كنت جيشك لما مماليكك باعوكى
و كنت يوسف لما عشتى سنين عجاف
و ضلوعى دى اللى فى معركة قادش حموكى
و شفايفى دى اللى مبطلتش فى يوم هتاف
انا كل شبر فى ارضك اتمرمغت فيه ....
و كل يوم عشتيه انا اتعذبت بيه ...
بتكرهينى عيونك السوده و ايامى اللى فاتت
منتشيش حبيبتى من النهارده ... حبيبتى ماتت
مع صوتك ادانك جرس فى الشده صاحينلك ..
من امتى كانوا الحرس هما اللى باقينلك ...
بعتينى علشانهم و عينيكى معصوبة ..
يا هل ترى خاينة و لا زيي مغصوبة ..
كل الكلام اتقال ... و الشعر بقى ماسخ
و الصبر علو جبال .... و الظلم شيئ راسخ
وطن و غرقان فى النطاعة ... كل شيئ ريحته نطاعة
علمونا بالعصاية ... و رضعونا الخوف رضاعة
علمونا فى المدارس يعنى ايه كلمة قيام ... قيــام
علمونا نخاف من الناظر .... فيتمنع الكلام
علمونا ازاى نخاف و ازاى نكش ...
بس نسبوا يعلمونا الاحترام
فمتزعلوش لما ابقى مش بسمع كلامكم
و متزعلوش لما ابقى خارج ع النظام


مستنى ايه من طفل ربوه بالزعاق ...
غير المشاكل و الخناق ...
كل اللى بيقلك بحبك دول نفاق ....
انا لما قلتلك بحبك كان نفاق ... كان نفاق
الحب يعنى اتنين بيدوا ..
مش ايد بتينى و ستميت تيت تيت يهدوا ..
الحب حاله ... الحب مش شعر و قوالة
الحب برااح فى قلب العاشقين للمعشوقين ...
يعنى الغلابة يناموا بالليل دافيانين
الحب يعنى جواب لكل المسجونين .. هما ليه بقوا مسجونين..
يعنى اعيش علشان هدف ... علشان رسالة ..
يعنى  احس بقيمتى فيكى ... انى مش عايش عوالة
يعنى لما اعرق تكافئينى بعدالة ...
الحب حالة ... الحب مش شعر و قوالة
الحب حاجة متتوجدش فى وسط ناس ...
بتجيب غداها من صناديق الزبالة ...
الحب جواكى .. استحالة


===================================================================


و مش حكمل جزئية جحا لأنه مبقااش يقولها برغم من انها كانت مهمة ... بس يالا زز التزاما بالنص و علشان ما اتشدش اشتباه :D

يوم صعب

طبعا الحر لا يطاق فى الأيام دى و الواحد بيجيب عرق اكتر ما بيشرب مياه و ده شيء يغيظ فى حد ذاته.

لأ و ايه بقى ده شهر رمضان (( أعاده الله علينا و عليكم بالخير و اليمن و البركات و بلغنا اياه )) جاى ان شاء الرحمن فى شهر 8, صحيح ممكن هيكون أخف شوية من الأيام اللى فى شهر 7 بس مفيش حاجة مضمونة فى البلد دى يا نصة ((: و كمان الحكومة هتظبطلنا الساعة يعنى بصراحة حنية قلب مبشوفهاش الا فى ماما نونة (: .

- طب يعنى ما احنا عارفين كل ده ... ايه الجديد بقى علشان تكتب موضوع و لا انت عايز تملا البلوج و خلاص ؟ ده انت غريب يا هانى (( اللى هو انا )) !!!!!

- يا جدعان ما انا جاى فى الكلام اهو - لو صابر القاتل على المقتول كان اتنيل لوحده (: - اصل الحكاية و ما فيها انهم احرجونى فى البيت ابويا ناوى يصوم و امى مش مسافرة - بس مفيش حفلة - و اخواتى برضه صايمين فمش هكون الفاسق الماجن اللى فيهم. عرق الشهامة نقح على و قولت طيب هصوم انا كمان اشمعنا انا يعنى .

المشكلة انى قولت كده و الشيطان استلمنى من هنا.

شوشو : يا بنى ما رمضان جاى اهو انت غاوى تتعب قلبك.

- لا لا اجمد يا واد ده فى مثابة الجهاد فى سبيل الله .

شوشو : يا بنى ما اصل انت جسمك ضعيف شوية مش هتستحمل العطش و الحر ؟

- انت هتجص ده اخويا ارفع منى و بسم الله ما شاء الله بنتحايل عليه علشان يبطل صيام اثنين و خميس شوية علشان صحته , ثم ان الصيام تهذيب للنفس (( فى كل حاجة )).

شوشو : طيب انت حر بس خد بالك ان انت رايح الكلية بكرة و هترجع فى عز الضهر يعنى هتاكلهم.

- اه و الله معاك حق .. سهله نغيب بكرة .. مجتش على يوم ... و اللى هعمله هناك هعمله هنا ... صح

شوشو : انت عبيط يا لا .. تغيب ايه .. دول هما يومين غياب هتستهبل من أولها.

- يا حنين خايف على مصلحتى اوى انت .... غلبان اوى .... الحنية بتخر منك .. عادى يا عم ما دام فى سبيل الله مش مهم.

شوشو : ده على اساس انك تقى اوى يعنى ... ثم انا بتكلم فى جزئية تانية خالص

-  (( برئ )) و ايه وجهة نظرك ان شاء الله ؟

شوشو : انت ناسى الايميل بتاع قطب لما قال ان غياب يوم هيتعامل كانه غياب اسبوع .... حراااام لازم تروح.

- اخخخخخ تصدق معاك حق .... يالا هو يوم صعب و يعدى و بعدين كله بثوابه.

شوشو : طب يا بنى ما الايام جاية كتيير عدى بكرة ده و استنى كده بعد رمضان يكون الجو هدى

- لا يا عم علشان  اتعود قبل رمضان و بعدين انت خنقتنى يالا انصرف علشان انت رغااى و ملكش غير فى الكلام الفاضى .... يالا وقتك خلص معايا.

شوشو : خلاص انا كان قصدى مصلحتك.

- اه ما انا عارف.

(( شوشو ده خنيييييق يا جدعان .... طبعا هو ممكن ما يكونش شوشو اللى بيتكلم و تكون نفسى هى اللى كانت قايمة بالواجب ده بس يا لا مش مهم اما اتبلى عليه ما هو هو اللى صاحب نفسى كتييير ))

نيجى للمهم علشان بجد يا جماعة ربنا يسترها فى الحر ده ساعة الصيام .. انا بجد مكونتش قادر و لما روحت قعدت اقاوح و اقعد على الجهاز خلص شوية حاجات كده بس مفيش انا ريقى كان راح.

قولت انام و كانت الساعة 4 تقريبا بس هو مين ده اللى هينام .... كل نص ساعة اتقلق و ابص على الساعة ..... المهم اننا وصلنا للمغرب الحمد لله و مستنى مكافأتى النهارده (( كوباية مايه ساقعة و قطرات المياه تداعب السطح الخارجى للكوباية و بعض من بخار الماء المتصاعد من على سطحها من البرودة .... يا سلام )) و تشربها يا بنى و تحس كأنك ملك ( ربنا يديمها علينا نعمة ... مياه النيل دى نعمة لا تقدر بمال ).

المهم اسيبكم بقى علشان اشتغل شوية بدل ما عبد العزيز يضربنى .... سلام

ضربة البداية

بسم الله الرحمن الرحيم

بعد طول تفكير فى مسألة انى اعمل بلوج و لا لأ .. و ايه اللى هكتبه هنا ... و طبعا ما أنكرش ان السبب كان فى مقابلة شخصية سألونى فبها عندى بلوج و لا لأ و كانت الإجابة شافية و قاطعة

 - و ممكن صادمة .. مش عارف ليه الصراحة - . لأ :D , و بعدها فكرت جديا فى انى ابدأ البلوج خصوصا لما شوفت البلوج بتاعة واحد من أصحابى فى القسم و هو أحمد العباسى ( zeacuss ) بصراحة عجبتنى الفكرة أوى ان الواحد يطلع اللى جواه ده بالرغم من اننى شخصية كتومة فيما يتعلق بشخصى أو بحياتى لأننى مبحبش اتكلم عن نفسى - طبعا مش تواضع بس لأن مفيش حاجة تستاهل انى اتكلم عليها - و ده طبعا هيجى بالتدريج و مش هتكون فضفضة بس .. يعنى أكيد الواحد هيتكلم شوية عن الدراسة و ما يتعلق بيها .... كفاية كده علشان حاسس ماتش السوبر هيبدأ و لازم أتفرج عليه ( بالتوفيق للأهلى و الأهلوية ... يا رب نكسب الحرس بقى :D ).

سلام و الى موضوع آخر.